أنا أشوف جاري مغير طباعه يحب التجارة ما عنده قناعة
ولا عاد صلى صلاة الجماعة
عسى الله يجيب العواقب سليمه
النصيحة يا جاري من صفى النية لا تمسك في الدنيا وترغبها
كلها فانية سبحان واليها
أحب المظاهر وأحب التجارة وعندي مزارع وعندي عمارة
وكل من أولادي عنده سيارة
عسى الله يجيب العواقب سليمة
أتمتع بمالي وش لكم فيه وأنت يا جاري أحذر لا تنشبها
لا تناهز يمين ما تقاويها
ترى جمعك المال ماهو سعادة لكن السعادة في زود العبادة
تزهد ومارس حياة الزهادة
عسى الله يجيب العواقب سليمة
العقيده على الإيمان مبنية نعبد الله وللدنيا تجاربها
والمواجيب نآخذها ونعطيها
ترى المال عندي شرابي وزادي وأنيمه بين الحضر والبوادي
وأعاند ولا أحد يقاوم عنادي
عسى الله يجيب العواقب سليمة
أنت مسكين في عينك حواليه ما تشوف الظروف اللي نعيش بها
المظاهر تحب الناس راعيها
تذكر نهار اللقاء والحساب مع ربنا وش يكون الجواب
وتب قبل يجيك صواط العذاب
عسى الله يجيب العواقب سليمة
أنت مغرور وأهدافك تجارية لقمتك لا تكبرها تغص بها
ثم نعجز عن العلة نداويها
لوكان البشر كلهم مثل جاري مجامل وعنده تخلف حضاري
يكون ما حد في جيوبه مصاري
عسى الله يجيب العواقب سليمة
أنت ما عندك إلا بيت وأرضية والمشاريع ما تعرف مكاسبها
عيشة الفقر يا ما أكثر بلاويها
يا كم تاجر قصر الموت حفله و لا فاده المال كثره وقله
ولومات قد مات قارون قبله
عسى الله يجيب العواقب سليمة
مكرة الوقت مأمورة ومنهية دنيا الأوهام حتى لو تغر بها
يشرب الموت ضاميها وراويها
أنا عندي الحل يا أهل القضية الأرزاق من عند رب البرية
ولا واحد ينتقد من خويه
عسى الله يجيب العواقب سليمة
أنت يا تاجر حسيت ما ليه اليمين البخيلة لا تمد بها
و الزكاة أئلك بالله توديها
الشاعر عقيلان القرني
ليست هناك تعليقات:
إرسال تعليق